تتجوزى امتى ؟؟؟؟؟

تتجوزى امتى ؟؟؟؟؟

تتجوزى إمتى ؟

اتجوزي لما تحسي إنك ممكن تصحي من أحلى نومة في عز البرد عشان تعملي له كوباية شاي وانتي مبسوطة مش وانتي بتقولي بالسم الهاري..

اتجوزي لما تلاقي نفسك تقدري تستحملي عصبيته وتكشيرته..

اتجوزي لما تلاقي نفسك عايزة تخرجي وتمنعي نفسك من الخروج عشان تقعدي معاه..

اتجوزي لما تحسي إنك تقدري تضحكي على نكتُه البايخة.. وتلاقيها تعجبك..

لما تلاقي نفسك مختلفة معاه في الرأي بس مش عايزة تعبري عن رأيك عشان متضايقيهوش..

لما تلاقي نفسك مستعدة تضحي بشغلك عشان تقعدي في البيت تريحيه أو تسافري معاه لمكان بعيد..

لما تحسي إنك ممكن تطلعي من بيت أهلك اللي عشتي فيه مش أقل من 20 سنة (مع التأكيد على إنهم ممكن برده يكون 16 مش 20) عشان تعيشي معاه..

لما تحسي إنك قادرة تستحمليه زي ما ناعسة استحملت أيوب..

لما تحسي إنك قادرة تتنازلي عن جزء أحلامك وطموحاتك _أو حتى كلها_ عشان تبسطيه..

أما أنت أيها ‫‏الشاب‬ :

اتجوز لما تحس إنها تكفيك عن كل ستات الدنيا..

لما تحس إن أكلها حلو مش لازم يكون زي أكل مامتك.. وإنك تقدر تهزر معاها زي أختك.. وإنك شايفها حلوة أكتر من اى حد .. وإنك تقدر تحكيلها أسرارك زي زميلتك في الشغل..

اتجوز لما تشوفها راجعة من برة سوده وطرحتها معوجة ومرهقة وهلكانة وبرضه تشوفها حلوة..

اتجوز لما تحس إنك تقدر تستحملها في حالات اكتئابها ونكدها وزعلها..

اتجوز لما تلاقي نفسك مش فارقة معاك هي طويلة ولا قصيرة.. ولا تخينة ولا رفيعة.. ولامنكوشة ولا مسرحة..

اتجوز لما تحس إنك تقدر تستحمل رغيها ولكَّها وصداعها حتى لو كانت بتحكيلك عن خط سير عفاف زميلتها من أول ماتصحى من النوم لحد ماتنام بالليل..

اتجوز لما تستحمل غيرتها.. وصوتها العالي ونرفزتها..

اتجوز لما تقدر تشاركها أحلامها وتساعدها تحققها وتشوف نجاحها من نجاحك..

اتجوز لما تلاقي نفسك خايف عليها وبتخاف تجرحها أو تأذيها..

من_الأخر اتجوزوا لما تلاقوا روح تستريحولها..

الرسول عليه الصلاة والسلام بيقول: " الأَرْوَاحُ جُنُودٌ مُجَنَّدَةٌ ، مَا تَعَارَفَ مِنْهَا ائْتَلَفَ ، وَمَا تَنَاكَرَ مِنْهَا اخْتَلَفَ "

بعد ما فكرت في كل ده لاقيت إجابة سؤال ( ‫‏أتجوزليه‬؟)

اتجوز علشان ‫‏أسباب سعادتي تزيد‬

الجواز من وجهة نظري وسيلة لتحقيق السعادة مش هدف..

الجواز سكة_سفر لازم نسافر فيها واحنا مطمنين ومستريحين .. عشان محدش يقدر يرجع

المسافة اللي مشيها من أول وجديد

المصدر: .:: منتديات الوليد ::. - من قسم: قسم الأسرة و تربية الاطفال, صحة و غذاء الطفل

via مدونة الوليد http://ift.tt/1o71eIW