ممنوع من السفر ممنوع من الغنا
ممنوع من الكلام
ممنوع من إلاشتياق
ممنوع من إلاستياء
ممنوع من إلابتسام
وكل يوم فى حبك
تزيد الممنوعات
وكل يوم باحبك
أكتر من اللى فات
حبيبتي يا سفينة
متشوقة وسجينة
مخبر فى كل عقدة
عسكر فى كل مينا
يمنعني لو أغير
عليكي أو أطير
إليكي واستجير
بحضنك
أو أنام
فى حجرك الوسيع
وقلبك الربيع
أعود كما الرضيع
بحرقة الفطام
حبيبتي يا مدينة
متزوقة وحزينة
فى كل حارة حسرة
وف كل قصر زينة
ممنوع من إني أصبح
بعشقك .. أو أبات
ممنوع من المناقشة
ممنوع من السكات
وكل يوم فى حبك
تزيد الممنوعات
وكل يوم بأحبك
أكتر من اللى فات
.........
للشاعر احمد فؤاد نجم
المصدر: .:: منتديات الوليد ::. - من قسم: شعر poems و خواطر
via مدونة الوليد http://ift.tt/1yJnTf9
Aucun commentaire:
Enregistrer un commentaire